أعلنت الفنانة جيهان قمري، عن رأيها في تمثيل الفنانة “ياسمين صبري”، خلال لقائها في برنامج “قعدة ستات”، والذي تقدمه الفنانة “مروة صبري”، وجاء ذلك عندما تم سؤالها عن اختيار أفضل ممثلة بين عدد من الممثلات، وقامت جيهان قمري باختيار دينا الشربيني، وعلقت على تمثيل ياسمين صبري بأنها لا تجيد التمثيل ووصفتها بأنها “ممثلة مش جامدة”.
جيهان قمري تهاجم ياسمين صبري
وأضافت جيهان في تصريحاتها “ياسمين قمر وشكل يجنن وموديل تحفة وأيقونة جمال فعلا حد حلو قوي بس مشوفتلهاش دور قولت واو عليه ده حقي إني أقول ده عاجبني ولا معجبنيش واللي يزعل يزعل واللي يتقمص يتقمص.. مش جامدة هي، لا أنا شايفة إن هو هو شغلها من أول عمل لغاية أخر حاجة عملاها هي نفس الحاجات”.
وتابعت “بتمنى لها بجد إن هي تكون حد جامد زي ما هي على السوشيال ميديا.. أنا عملالها فولو أصلا وبتفرج عليها ومن معجبينها لأن أنا بحب شكلها لما ببصلها ببقى سعيدة وأنا بحب الحاجة الحلوة.. ناس تانية بتشوفها ممثلة كويسة وإن أنا اللي مش كويسة دي أراء”.
وقدمت جيهان عدد من الأعمال الفنية الناجحة، والتي نالت إعجاب الكثيرين من مصر والوطن العربي، وتعتبر مشاركتها في مسرحية “نجوم الظهر”، مع الفنان الكبير “محمد صبحي”، والذي تأتي المسرحية من تأليفه وإخراجه، هي آخر أعمال الفنانة جيهان قمري، وتم عرضها في عام 2021 الماضي.
طليق جيهان قمري
وعلى جانب آخر، كشفت الفنانة جيهان قمري عن أسرار بشأن طليقها وأسباب انفصالهم، وأكدت بأنها تعرضت للعنف منه، وأنه قام بالتعدي عليها بالضرب لأكثر من مرة، وعلقت على هذا الأمر “كانت تجربة وحشة وندمانة عليها .. معرفش المشكلة فين بس هي كانت تجربة سيئة جدا وخلتني أقفل من الجواز خالص للأسف، أنا أي حاجة بتوجعني أو بحس إنها ممكن تكسرني بتقويني أكتر بتخليني أرجع أعيد حساباتي تاني وأبص للحكاية من منطلق تاني خالص”، وتابعت “أنا كنت متجوزة جواز مدني، وقررت اتطلق وانهيت كل أوراق الطلاق ومعي كل الأوراق، ولغاية النهاردة هو ممعهوش ورقة تثبت إننا اتطلقنا.. عالورق قعدنا مع بعض 6 شهور وفي الحقيقة قعدنا 3 شهور بس.. ومطلعش راجل بمعنى الكلمة”.
وأضافت “الراجل اللي يمد إيده على ست ويطلع نقصه عليها مقدرش أقول عليه راجل ولا أقدر أكمل معاه الحياة مش مستاهلة مفيش حاجة تخليني أكمل .. مد إيده عليا تلطيش بس مش عايزة أتكلم عديها .. هبقى كدابة لو قولت إن الموضوع مأثرش فيا لا أثر فيا وعلمني كتير ضربني قلم فوقني اللي هو إيه ده أنا رايحة فين لا خلاص كده خلصت مش عايزة أروح أقسام .. هو مكنش معاه فلوس واللي هو كان قايله غير اللي اكتشفته”.